بقلم اسراء جمال الجزء الثالث

سيدنا آدم وزوجته بالابتعاد عن التفاحة كان أمره لا تقربا..
متقربيش من أسباب وقوعك في المعصية وتقولي مش هعملها وهمسك نفسي مفيش حد بيمسك نفسه النفس أمارة بالسوء..!
متشتكيش مش عارفة تبطلي الذنب سنين ليه وإنتي نفس نظام حياتك لازم تتعبي وتغيري وتبعدي تماما متحاوليش تقربي وتقولي همسك نفسي!
حسيت التجربة فعلا علمتنا التجربة ومعانا حد فوق مننا فاهم بيتابعنا زى طنط العجوزة كان مفيد اوي لينا قدرنا نجرب ونغلط ونتعلم من أخطائنا الشهر كان باقي عليه يومين ويخلص خلاص!
ياااه الأيام عدت بسرعة أوي!
الصراحة يا سارة محتاجة اكلمك في حاجة.
_خير يا طنط
كلامك مع عمر.
_ماله عمر!
عمر شخص أجنبي عنك وإنتي من أول يوم مش عاجبني طريقتك معاه لازم تخلي بالك.
_بس هو شخص محترم.
محترم لنفسه الحلال بين والحرام بين طول ماهو مش جوزك ولا اخوكي ولا أبوكي يبقى ملوش صلاحية قرب العلاقة بالشكل ده..
طنط أصرت تقول الكلام ده بنفسها لعمر هو كمان علشان تعفيني من الإحراج و علشان تحافظ علينا..
عدى اليومين وكانوا صعبين عليا أوي علشان من غير دعم عمر حسيت بقيمة وجوده وإنه الدعم فعلا بيفرق وجود حد بيحبنا بيشجعنا له دور كبير مكنتش مستوعبة إن قدرت أحقق نجاح زى ده وفعلا كنت قد المسئولية كان نفسي أجري على عمر أشاركه بس للأسف مكنش ينفع!
دلوقتي تقدري تخرجي من قسم المجهولين.
برغم إن كنت منتظرة الجملة دي إلا إن كنت زعلانة ده المكان اللي عرفني على عمر عمر اللي في خلال شهر قدر يغير فيا كتير أوي..
_يلا يا سارة
مسكت إيد طنط وأنا محتارة بس مسكتها ومشيت وواسيت نفسي وقتها بجملةمن ترك شيئا لله عوضه الله خيرا منه
بس لما خرجت كانت المفاجأة..
كان عمي!
شرفتيني يا سارة طلعتي قد المسئولية وخييتي ظننا كلنا!
_يعني إنت اللي دخلتني قسم المجهولين.
كنت قلقان عليكي بس كنت واثق فيكي ووجود طنط رباب معاكي ساعد كتير.
_تصدق أول مرة أعرف إسمها كنت بقولها يا طنط خبرة أو طنط العجوزة.
يلا بينا علشان نروح أكيد مامتك وحشتك أوي.
مكنتش متخيلة إن هتأثر بالحكاية بالسرعة دي هو أه أنا محققتش نجاح عظيم لسه الكتابة لسه في البداية الكتب قرأت كتاب واحد بس البنات اللي ساعدتهم هما بنتين اللي بدأوا معايا بس عالأقل خطيت أول خطوة في طريقي بدأت فعليا رحلتي الحقيقية في الحياة..
كنت بودع حلم جميل عشته حلم قررت أكمله بس باختلاف الأماكن والأشخاص حلمي مينفعش يتعلق بشخص ولا مكان إكتشفت إن حلمي كبييير كبيييير أوي ويستاهل المعافرةة!
_بس قبل ما نمشي فيه حد عاوز يقولك كلمتين.
حد مين
_بصي وراكي وإنتي تعرفي.
بصيت وكان عمر..
إحنا بدأنا الرحلة سوا ف مش جدعنة تسيبيني وتخلعي كده.
_عمر من ترك شيئا لله عوضه.
ومين قالك إنك هتتركيني ومتقلقيش كله بما يرضي الله برضه.
_يعني إيه
يعني أنا بقول نسافر معاكو أنا والمأذون مينفعش تدخلي على أهلك بإيديك فاضية برضه.
_أقوم دخلالهم بجوزي.
هو فيه مفاجأة أحلى من دي
_لو حلفتلهم من هنا للصبح إنك نيتك سالكة ومكنتش ماشية معاك مش هيصدقوك هتاخد علقة من أخواتي تنسيك إنت مين.
يرضيك كده يا عمي اللي بتعمله بنت أخوك
_اللي يرضيني إنك تستهدى بالله وتروح تكلم أهلك ومستنينكو بكرا بعد العشا..
طب والمأذون
_حد يدخل من أول مرة يقول للناس هكتب كتب كتابي على بنتكو.
صدقني يا عمي دي قادرة وهتهريني ضوابط خطوبة.
_حيث كده إلحق إحجز رقم المأذون بقى.
هجيلك بكرا أنا والمأذون وأحلامي سوا هجيلك نحط أحلامك على أحلامي ونبدأ رحلتنا الجديدة هجيلك علشان الرحلة لوحدي مملة وأنا محتاجك معايا ونس!
_مفيش
رد قبل كتب الكتاب.
أهو شفت مش قلتلك يا عمي!
وحلما عاليا نهيم معه وقمما سوية نسعى لها غدا.
إسراء جمال